Chreßbaumsleid

zoletz jeändert: 0-.-1.2017   Druckerfründliche Sigg •  Info zu: Peter Berchem • 13099 × beluurt.



 
No ligen ich bei Schott un Scherve,
vörüvver eß dä schönen Draum;
mer liet mich sterven un verderve,
un wor doch su 'ne staatsen Bauml
Wor dat en Freud en alle Stroße,
wie't heesch, de Chreßbäum wören do!
De Kinder Schull un Spill vergoße
un feefen bis noh'm Maat uns noh.

Ich woot wie all ming Kamerade
verkauf un en en Huus gebraaht,
met leckere Saache schwer belade,
met bunte Kralle fing gemaaht.
Un wie vum Toon de Klocke klunge,
do stunnt idl do en Glanz un Praach,
un all de Augen an mer hunge
beim Leedche vun der hellige Naach.

Ich dorf noch off mich präsenteere
en minger Staat vör jungk un ald,
bis dat ich Nodelen dät verleere,
do woren och ming Daag gezallt.
No ligen ich bei Schott un Scherve,
vörüvver eß dä schönen Draum;
mer liet mich sterven un verderve,
un wor doch su 'ne staatsen Baum!

Su heisch et männichmol och em Levve,
wann do ding Schöldigkeit gedonn,
un deer der Avscheed weed gegevve,
grad wie beim Baum: "Der Mohr kann gonn!"
Doch muß do dann nit kühme, klage,
un wann et hee un do och fäählt,
muß stolz un stell die Krützgen drage;
denn Undank eß der Luhn der Welt!
 
  <<< widder öm
 
Impressum | Dienstag, 24. Oktober 2017 | Copyright © 1998 - 2017 Udo Gerth, Köln | 1 Besucher online | # 1504599 | PI's: 4776072