E Möschebegräbnis

zoletz jeändert: 0-.-1.2017   Druckerfründliche Sigg •  Info zu: Peter Berchem • 10495 × beluurt.



 
Et wor dise Summer. Do kütt op enen Daag
der Fritz en et Zemmer gesprunge
un hät en dud Mösch en der Hand, un hä laach:
„Die hann ich em Gade gefunge!

Komm Liesge, komm met!” hä för’t Schwesterche säht.
„Die weed hügg begraven em Gade,
lauf flöck ehsch un dunn noch der Jupp un et Nett
zum Möschebegräbnis enlade!” —

Et Liesgen dat läuf, dat im fleegen de Zöpp,
vör Iefer sing Bäckelcher flamme;
et weiß, op dem Keeschbaum do fingk et die Ströpp,
glich drop eß dat Schmölzge zesamme.

Der Fritz, dä alld deent en Zint Görres de Meß,
muß hügg der Pastor hee avgevve;
der Jupp dräht de Mösch en ‘ner Greffelekeß;
de Mädcher gonn langsam dernevve.

Se halden ehr Schützelcher vör et Geseech
un dunn su, als däten se krische;
der Jupp süüht vum eine noh’m andere Weech
un deit sich sie Nääsgen avstriche.

Der Fritz ähnz vöropgeiht wie singe Pastor
un deit sich genau wie dä halde
un fääht sich wie dä och ens üvver de Hoor
un trick och sing Steen jett en Falde. —

No sin se am Keeschbaum, hee maachen se Hald,
der Jupp setz sing Dudelad nidder;
hä kühmb ens, als wör hä Godd weiß alld wie ald,
un deit su, als hätt hä der Zidder.

Hä kromb enen Eßlöffel us singer Täsch
un böck sich un määht ehsch veer Schrömcher;
dann schöpp hä däm Vuggel sie Grävge zerääch
un setz an et Koppengk zwei Blöömcher. —

De Mösch eß begrave! De Mädcher jitz hann
genog lamenteet un gekresche;
do hämsch der Pastor, un hä süüht se all aan
un fängk vun der Mösch aan ze spreche:

„Hier unter dem Kirschbaum, da liegt jitz dä Hans,
dä süns hat da obe gesesse
un hat da gepiepsch un gehüpp un gedanz
un uns all de Kirsche gefresse.

Jitz muß er derfür auch — un dat iß im gut —
ganz dief in der Müschehöll sitze,
da schwitz er sich immer vun neuem ze Dud,
dat iß för sein Kirschestibitze!” —

Der Fritz dä eß fädig. Die andere stonn
un künne vör Staune nichs sage,
bis dann der Jupp meint: „Mer welle jitz gonn,
die Prädig — — die litt mer em Mage!”
 
  <<< widder öm
 
Impressum | Dienstag, 24. Oktober 2017 | Copyright © 1998 - 2017 Udo Gerth, Köln | 1 Besucher online | # 1504599 | PI's: 4776059