Am Wägkrütz

zoletz jeändert: 0-.-1.2017   Druckerfründliche Sigg •  Info zu: Peter Berchem • 9501 × beluurt.



 
Et steiht e Wägkrütz vör der Stadt
Verloßen un vergesse;
Der Meister, dä et hät gemaaht,
Weed keiner wahl mih wesse.

Et steiht do unger 'nem alen Baum,
Ne Reß geiht durch de Medde;
Der Herrgodd dran erkennt mer kaum,
Dä hat et miets geledde.

Doch wenn dat Krütz verzälle künnt,
Et wöß uns vill ze sage
Vun Minscheleid un Minschesünd,
Wat all woot derrgedrage.

Der ein gingk en de Stadt erenn
Voll Hoffnung, unverdorve,
Un kom zeröck met schwerem Senn:
Sing Unschold wor gestorve.

Der andere trok zor Stadt eruus,
De ganze Welt ze kaufe,
Un schlech sich beddelärm noh Huus
Un stervensmöd vum Laufe.

Se maahten an dem Wägkrütz Hald,
Die su op heim aan ginge,
Un hann dem Herrgod dran verzallt,
Wovun ehr Hätz wollt springe.

Dä hät se stomm bloß aangelot
Bei ehrem bettere Klage,
Un jedem wor, als wenn hä hoot:
»Ich hatt noch mih ze drage.«

Dann woot dat Hätz do unger stell,
Wie schwer et hatt geledde,
Un saaht getrus: »Wie Godd et well!»
Un kunnt sich widder bedde. —

Jitz steiht dat Wägkrütz vör der Stadt
Verloßen un vergesse,
Un nit mih lang — woot meer gesaaht —
Dann weed et avgeresse!
 
  <<< widder öm
 
Impressum | Dienstag, 24. Oktober 2017 | Copyright © 1998 - 2017 Udo Gerth, Köln | 1 Besucher online | # 1504599 | PI's: 4776069