Hurrah, e Schwesterche!

zoletz jeändert: 0-.-1.2017  Druckerfründliche Sigg •  Info zu: Jean Jörrissen • 24420 × beluurt.

 
»Stell, stell, komm höhsch, komm leis de Trapp erob
Un dun de Schöhncher us ald vör der Döre;
Un, Pitterche, paß eckersch mer nor ob,
Un dun et Mütterche em Schlof nit störe!
Se wor nit god, un wie se schleef, do flog
Der Storch do durch et Finster an et Bettche
Un laht ehr jet, wat hä em Schnabel drog,
Flöck en der Ärm, e klitze klein Pakettche.

Ich kom eren, ein Augenbleck jedoch
Maht hä, der Storch, sich wider ob de Lappe.
Ich reef im noh un winkten im och noch.
Dat moots do sinn - hä dät me'm Schnabel klappe
Un flog su huh wie nor 'ne Vugel flüg.
Et Mütterche, dat wor ganz krank vun Schrecke,
Dat Päckelche, dat heelt se faß, un süch,
Ich wor zo bang, se us dem Schlof ze wecke.

Do wood se wach, se sohch mich an un laach,
Als dät se üvver dat Pakett sich freue.
Ich lorte och ens drob, ovschüns ich daach:
»Dat weed nix Rar'sch sin, wat dä der dät däue!«
Ich sohch ens dren un, Pitterche, no denk,
E adig, mugglich Weech dät mich anlore,
Su klein, su leev; dat hät dä Storch geschenk.
Wat, kleine Stropp, dat weesch do nit bedore?«

»E Schwesterche, leev Groß?« - >Jo, leeve jung,
E Schwesterche; no kanns do ävver laache!«
»Hurrah!« reef hä, dä kleine Quant, un sprung.
»B-'scht«, säht de Groß, »nor kei Spektakel maache!«
Stell satz hä sich un - üvverlahte dus.
Ob eimol säht hä: »Groß, ich well der sage,
Dat weed et letz wal sin; en einem Hus
Zovill der Quös - dat deit sich nit verdrage!«

Jean Jörrissen

 


Diesen Artikel bookmarken bei...

BlinkList del.icio.us Folkd Furl Google Linkarena Mister Wong Yahoo MyWeb YiGG Webnews


  <<< widder öm
 
Impressum | Dienstag, 24. Oktober 2017 | Copyright © 1998 - 2017 Udo Gerth, Köln | 1 Besucher online | # 1504599 | PI's: 4776047